النهارده ليله العيد وجدو بسبس زى العاده صام وصلي وفى المغرب اكل فطاره مع اوﻻده ونزل الجامع صلي العشاء وهنئ اهله وجيرانه بالعيد وطلع البيت لقى احفاده متجمعين وبلهفه لحكاياته منتظرين ،جدو بسبس ضحك وقال خير يا حبايبي الحلوين مالكم هنا متجمعين
ردوا وقالوا عاوزين نعرف مين اللي كنت عندهم بعد صﻻة العشاء وليه اتأخرت علينا واحنا منتظرين حكاية جديدة زى كل عيد
ضحك الحاج بسبس وقال كنت بهنئ اصحابي وجيرانى بالعيد وﻻزم تتعلموا انتوا كمان تعملوا كده ﻻن ده واجب علينا وكمان ﻻزم نساعد اللي مجابش اكل او لبس جديد للعيد
ودلوقتى بمناسبة اللبس الجديد هحكى لكم حكايه سلوى وفستان العيد
بس الاول هنصلي علي النبي محمد عليه الصلاة والسلام
فقال اﻻوﻻد :عليه الصلاة والسلام
كان زمان فى بلد من بلاد الله الواسعه بنت صغيرة عايشه مع ابوها وامها فى بيت صغير ومعاها اخوها الصغير وكان اﻻب عامل بسيط بيصحي من نومه يسعى علي رزقه ورزق عياله ويجيب لهم اللي يكفي يومهم من اكل وشرب ...وسلوى كانت بنت شاطرة بتحب تسمع كلام والدتها والنهارده ليله العيد وهى شايفه الناس فرحانه واصحابها واقفين بيغنوا وكله بيتكلم عن لبس العيد واللي جابت فستان احمر وفيونكه حمرا لشعرها الطويل ..وهى واقفه ساكته بتسمع بابتسامه مخبيه دمعه عشان هى عارفه انها السنه دى مش هتجيب لبس جديد ...المره دى جابوا ﻻخوها لانه عليه اول عيد وهى رضيت وقالت :مش مهم اجيب لبس جديد عندى فستانى وممكن البسه يوم العيد .
نامت سلوى وسرحت بخيالها وشافت في حلمها فستان جميل احلي من كل فساتين البنات فى العيد
صحيت سلوى من نومها علي ايد حنونه بتحضنها وصوت رقيق بيقول لها :صباح الخير عيد سعيد قومى شوفى فستانك الجديد
سلوى قامت من نومها بسرعه وهى فاكره نفسها بتحلم لكن والدتها كانت واقفه وفي ايدها فستان حرير بفيونكات قطيفه وشكله اجمل من كل فساتين بنات الحى
قالت سلوى وهى مستغربة ده فستانى ...ماما انتى عملتيه عشان البسه فى العيد
ضحكت والدتها وقالت : سهرت وعملته بايديا لاجمل بنت شافتها عينيا عشان تكونى اميرة بنات الحى بفستانك الجديد ويلا بسرعه البسي فستانك وافرحى بالعيد
سلوى فرحت بفستان العيد وكانت ماشيه بين الناس وكانها اميرة بفستانها الرقيق اللي اتغزل من حب والدتها وحنانها .
وبكده تعرفوا ان اللي عنده ام بتهتم بيه وتفضله علي نفسها وراحتها وتعبها ﻻزم يحمد ربنا وكمان منجرحش الناس بلبسنا الجديد ﻻنك متعرفش مين مقدرش يجيب لبس جديد .
ودى كلمه افتكروها مني ..ودلوقتى ايه رايكم فى الحدوته حلوة وﻻ ملتوته
ليست هناك تعليقات:
إرسال تعليق